Glam-divas 1: Talia

“Wag nou, luister net na my ...” Linka spring opgewonde van die bed af. “Wat daarvan as ons drie ’n styling-agentskap begin.”

“’n Wát?” Didi bars uit van die lag.

“Jy kan maar lekker lag, Didi – ek dink dis ’n moewiese plan. Sê nou maar die laerskool bied ’n konsert aan en die juffrou wil graag die graadeens soos pampoene aantrek, dan kan sy na ons toe kom. Of sê nou ou Henco Smit wil ’n keertjie Meidans toe gaan, maar hy weet nie wat om te doen en hoe om aan te trek nie, dan kom hy na ons toe ...”

’n Funky agentskap wat partytjies reël, fantastiese klere ontwerp en modewenke gee.

Talia, Didi en Linka besluit dit is presies wat die skool nodig het.

Maar as jy in graad tien is, is dit nie kinderspeletjies om almal te oorreed om jou ernstig op te neem nie.

Boonop maak Chanel en haar skoothondjies dinge gedurig vir Talia en haar twee vriendinne warm. En dan is daar nog Sarel, wat Talia se bene elke keer lam maak, al is hy eintlik te oud vir haar. Om nie te praat van Werner met sy donker oë, sy motorfiets en sy hartebreker-reputasie nie ...